عنها ومن بعد ما ابن الحلال قرر ما يبقاش خيّال ولا يجي على حصانه ولا حتى يركب أفيال ،قررت تعيش قصة حب وهمية ،بتحصل في خيالها وبس،بينها وبين نفسها ، قررت تحب ابن خيالها وأمير أحلامها اللي لما بتصحى من النوم بتتخيل نفسها نايمة على دراعه وانها هتصحى بسرعة تغسل وشها وتسرح شعرها علشان ما يشوفهاش منكوشة وتطل عليه وهو نايم وتقعد تتفرج عليه "زي الملاك اسم الله عليه "...ابن الخيال مفيهوش عيب ولا غلطة ، ممكن لما يجي رايح الشغل يرجع بعد 10 دقايق لحضنها ،علشان مافيش احلى من حضنها جنة في الوجود
ابن خيالها ملأحياتها خلى الابتسامة ما تفارقش وشها ،كل لما تحب تلاقيه تختلي بروحها وتدور عليه عادة كان بيجي جري
بس حتى ده استكتروه الناس عليها واتهموها انها قربت تجنن وانها عندها حالة نفسية وفي اللي قال دي مخاوية، ولما عرف ابن الخيال باللي بيتقال عليها اتوجع اوي وقرر انه مش هيزورها تاني ولا حتى في المنام ، ليالي طوال قضيتها في حزن وفضلت تنادي عليه "انت فين يا ابن الخيال يا امير احلامي وفرحة ايامي "
عدت ايام وشهور عدت كانها دهور وفي يوم من الايام كانت في البنك اللي بتشتغل فيه ،الملل سيد الموقف ولا مهرب منه ،الوقت بيعدي ببطء زي راجل عجوز ماشي على جريدة نخل فوق ترعة صرف ،وجيه كان شبه ابن خيالها اوي يمكن كان اطول حبة حط فلوس واخد فلوس هي ماكنتش مصدقة نفسها من الفرحة الشئ الوحيد اللي دايقها انه ماكنش عارفها ،مشي ونسي بطاقته في البنك معها وهي ابتسمت ابتسامة ليها معاني كتير ومعها ابتسمت الحياة وشالت البطاقة علشان تكلمه بكره يجي ياخد بطاقته ...زي ما اخد قلبها من قبل حتى ما تعرف انه موجود في الحياة دي :))))
