حلو الكلام لحد كده
المهم في تالت يوم اتمنع عرض مسرحي بحجة انه عرض سياسي والمحافظ والامن قرروا يبقى فيه رقابة وممنوع الكلام في السياسة والدين والجنس
المحرمات الثلاث !!!
اتمنع العرض وكذا عرض تاني،صديق بيقولي تعقيبه على الحدث رجعنا تاني للزمن الوسخ - قصده ايام مبارك-
المهم احب احكي لكم عن موقف تاني حضرته بنفسي وكان موافق تاني او تالت يوم عيد الاضحى اللي فات كانت مجموعة ايد في ايد عاملة حفلة في حب مصر بعنوان ايد في ايد من اول ما وصلنا عند الحفلة كان في تجمع لمجموعة من المتشددين اللي كانوا بيعملوا المستحيل لمنع الناس خاصة لو كان فيهم محجبات من دخول الحفلة بحجة دي ترانيم للدرجة اللي حاولوا شد سيدة منتقبة من ملابسها لمنعها!!
بعد مرور حوالي ساعة كل الناس اتطردت من الحفلة - هو ده التعبير الادق- الامن خرج كل الجمهور علشان زعل الاخوة المتشددين اللي بره !، المشهد بقى الاقوى واللي ينفع مشهد سينمائي جدا واحنا خارجين من الحفلة على البوابة الاخوة المتشددين واقفين بيرددوا سورة الصمد"قل هو الله احد (1)الله الصمد" كأننا مثلا شياطين ولا اشباح واجب طردها وقراء رقية لفك سحرها وعلى الجانب التاني واقفين الشباب يهتفوا كدابين تجار دين
الامن ساعتها انصاع لرغبة الجماعة دي واخرج اكتر من 3 الآف مواطن دخلوا الحفلة دي ! ملحوظة الموقف ده حصل في حكم مرسي
محصلش اي رد اعتبار ساعتها لا ده كمان حصل اشتباك بين الجماعة المتشددة والشباب وتم الاعتداء على شباب من مجموعة ايد في ايد !
خلاصة الموقفين ان السلطة عندها مشكلة مع الفن و حرية التعبير وخاصة كل ما كان الفنان قريب ، المسرح اخطر من التليفزيون لانه بيحكي معاك مباشرة مش عن طريق وسيط وبينك وبينه حاجز
الفنانين الشباب المستقلين اجرأ من الفنانين اللي بيقبضوا بالملايين وبيقدموا هلس ومسخرة و مع ذلك عمر دول ما اتمنعوا من اي كلام تافه وقذر بيقدموه
المهم في الاخر نصيحة لاي حد هيعمل حفلة في المنيا ما تعملهاش قرب عيد الاضحى !
وكل سنة وانتم طيبين
ليست هناك تعليقات:
إرسال تعليق